បំណុលធនាគារហាក់បានក្លាយជាកង្វល់មួយកាន់តែរីកធំឡើងនៅក្នុងសង្គម ។ យ៉ាងហោចណាស់ មានពលរដ្ឋប្រមាណ៤លាននាក់ ត្រូវគេដឹងថា បានខ្ចីបំណុលពីធនាគារ និងគ្រឹះស្ថានហិរញ្ញវត្ថុមកប្រកបអាជីវកម្ម និងទ្រទ្រង់សេដ្ឋកិច្ចគ្រួសាររបស់ខ្លួន ។ ក្នុងចំណោមពលរដ្ឋដែលមានបំណុលនោះ ប្រាកដណាស់មានពលរដ្ឋមួយចំនួនបានកំពុងលំបាកនៅក្នុងការរកប្រាក់សងបំណុលគេ ។
ពលរដ្ឋដែលបានខ្ចីបុលពីធនាគារបានកំពុងធ្លាក់ខ្លួនជាកូនបំណុលលើសពីមួយកន្លែងក្នុងពេលតែមួយ។ អ្វីដែលជាក្តីបារម្ភលើសពីនេះ គឺពួកគាត់អាចនឹងដើរទៅខ្ចីបុលគេពីកន្លែងមួយយកទៅសងកន្លែងមួយ ជាងនេះទៅទៀតពួកគាត់អាចធ្លាក់ខ្លួនជាកូនបំណុលស្ថាប័នខុសច្បាប់ ដែលមានការប្រាក់ខ្ពស់ ហើយនៅទីបំផុតពលរដ្ឋនឹងមានបំណុលវ័ណ្ឌក ។
លោក សុផល ពលរដ្ឋនៅភ្នំពេញនិយាយថា គាត់បានខ្ចីបុលចំនួន៦ម៉ឺនដុល្លារពីធនាគារមួយ ដើម្បីទិញផ្ទះស្នាក់នៅ កាលពីឆ្នាំ២០១៩ ។ លោកត្រូវបង់៦០០ដុល្លារទៅឱ្យធនាគារនៅរៀងរាល់ខែក្នុងរយៈពេលជាង១៥ឆ្នាំ ។ «រហូតមកដល់ពេលនេះ ខ្ញុំបានបង់ឱ្យធនាគារបានតែប៉ុន្មានឆ្នាំប៉ុណ្ណោះប៉ុន្តែឥឡូវនេះ សឹងគ្មានលទ្ធភាពសងគេហើយ ។ ពេលនេះមានការលំបាកខ្លាំងណាស់ក្នុងការរកប្រាក់បង់ទៅឱ្យធនគារ ដោយសារចំណាយគ្រួសារកាន់តែច្រើនឡើង ។ ជាពិសេស ចំណាយលើកូនៗដែលពួកគេកាន់តែត្រូវការចំណាយកាន់តែច្រើននៅក្នុងការសិក្សា»។ បុរសដែលមានកូនបី រូបនេះ បាននិយាយបន្តថា នៅក្នុងមួយខែៗការចំណាយរបស់លោកទាំងការសិក្សារបស់កូន ទាំងអាហារប្រចាំថ្ងៃមិនតិចជាង១ពាន់ដុល្លារនោះទេ ។ បើបូកថវិកាដែលត្រូវសងធនាគារទៀត គឺគ្រួសារលោកត្រូវរកចំណូលឱ្យបាន២ពាន់ដុល្លារក្នុងមួយខែ ។
លោកសុផល ត្អូញថា ការដែលលោកហ៊ានខ្ចីប្រាក់ពីធនាគារមកទិញផ្ទះបែបនេះ ដោយសារ លោកមានដីមួយកន្លែងសម្រាប់លក់ដោះដូរ ។ ប៉ុន្តែចាប់ពីផ្ទុះកូវីដ១៩មកដីរបស់លោកនោះលក់មិនចេញសោះធ្វើឱ្យជីវភាពរបស់កាន់តែលំបាក ។ «ខ្ញុំពិតជាមានការលំបាកនៅក្នុងការរកប្រាក់សងធនាគារ ។ យើងគ្មានមុខរបរអ្វីក្រៅពីប្រាក់ខែ ដូច្នេះបើកប្រាក់ខែមកទុកសម្រាប់សងគេ និងបង់ថ្លៃសាលាកូនប៉ុណ្ណោះ ។ ទោះខំកាត់បន្ថយចំណាយយ៉ាងណាក្តី តែវាបានធ្វើឱ្យយើងមានកង្វល់ក្នុងចិត្តរាល់ថ្ងៃ ។ ជិវិតហាក់មានសម្ពាធធ្ងន់មួយខ្លាចកូនឈឺ ខ្លាចខ្លួនឈឺគ្មានលុយព្យាបាល ជំងឺពីព្រោះ គ្មានលុយសល់ជាប់ខ្លួនសោះតែម្តង ។»
គិតត្រឹមឆមាសទី១ ឆ្នាំ២០២៣ ឥណទានផ្តល់ដោយគ្រឹះស្ថានធនាគារ និងហិរញ្ញវត្ថុដល់ប្រជាពលរដ្ឋមានចំនួន២៣៨,៧ ទ្រីលានរៀល ឬស្មើប្រមាណ៥៧,៨ ប៊ីលានដុល្លារអាមេរិកកើនឡើង១០,៥% ធៀបនឹងគ្រាដូចគ្នាឆ្នាំមុន។ តាមសមាគមគ្រឹះស្ថានហិរញ្ញវត្ថុកម្ពុជាថា ឥណទានទាំងនេះគ្របដណ្តប់លើវិស័យជួញដូរដុំ និងរាយការទិញផ្ទះជាកម្មសិទ្ធិផ្ទាល់ខ្លួន កសិកម្ម សេវាកម្ម អចលនទ្រព្យ សំណង់ អង្គភាពគ្រួសារ កម្មន្តសាល និងឥណទានផ្សេងៗ។
ថ្មីៗនេះ មានរបាយការណ៍មួយបានបង្ហាញថា ប្រជាពលរដ្ឋកំពុងបង្កើនការយកកម្ចីថ្មី ដើម្បីទៅសងកម្ចីចាស់ និងបានកំពុងបង្កជាក្តីបារម្ភមួយ ។ ពិសេសវាអាចប៉ះពាល់ដល់សិទ្ធិមនុស្សទៀតផងនៅពេលពលរដ្ឋគ្មានលទ្ធភាពសងបំណុលគេ។ តាមការសិក្សានោះបានរកឃើញ ប្រជាពលរដ្ឋតាមខ្នងផ្ទះជាង៩២% ត្រូវបានតម្រូវឱ្យដាក់ប័ណ្ណកម្មសិទ្ធិដីធ្លីយ៉ាងតិចមួយ ដើម្បីវាយតម្លៃពីកម្ចីឥណទានខ្នាតតូចមួយ ខណៈពលរដ្ឋតាមខ្នងផ្ទះ ៦,១% បានលក់ដីដើម្បីសងបំណុល។
លោក កាំង តុងងី អ្នកនាំពាក្យសមាគមមីក្រូហិរញវត្ថុកម្ពុជា បាននិយាយថា នៅក្នុងពេលនេះ កម្ចីដែលខូចខាតពោលពលរដ្ឋដែលបានខ្ចីប្រាក់ពីគ្រឹះស្ថានហិរញ្ញវត្ថុហើយ គ្មានលទ្ធភាពសងវិញនោះ ស្ថិតនៅក្នុងរង្វង់ក្រោម៤%នៅឡើយទេ។ លោកថា បញ្ហានេះអាចធ្ងន់ធ្ងរ នៅពេលវាមានអត្រាលើសពី៥%ឡើងទៅ ។
នៅក្នុងកម្មវិធីវិថីហិរញ្ញវត្ថុភាគទី៨ ដែលនិយាយពីដំណោះស្រាយឥណទានមានហានិភ័យ ឬបញ្ហាលទ្ធភាពសងនេះ អ្នកនាំពាក្យសមាគមមីក្រូហិរញវត្ថុកម្ពុជាស្នើ ទៅពលរដ្ឋដែលគ្មានលទ្ធភាពសងបំណុលឱ្យធនាគារ គួរជួបពិភាក្សាជាមួយភ្នាក់ងារឥណទានស្ថាប័ន ដែលខ្លួនបានខ្ចី ដើម្បីរកវិធីដោះស្រាយស្របច្បាប់ជាជាងការទុកឱ្យបញ្ហាកាន់តែធំ ហើយយកទៅបង្ហោះនៅលើបណ្តាញសង្គម ដែលមិនអាចដោះស្រាយអ្វីបានទាំងអស់នោះ ៕
