ខេត្តសៀមរាប ៖ លោក អៀង ពិសិដ្ឋ អភិបាលស្រុកស្វាយលើ មានប្រសាសន៍នៅព្រឹកថ្ងៃទី១៣ ខែកញ្ញា ឆ្នាំ២០២៣នេះថា ស្រុកស្វាយលើ គឺជាស្រុកមួយស្ថិតនៅតំបន់ឦសាននៃខេត្តសៀមរាប ដែលកាលពីមុន បើយើងនិយាយពីស្រុកមួយនេះ គេតែងនឹកស្រមៃថា ទីនេះជាតំបន់ដែលដាច់ស្រយាល និងជាទឹកដីនៃសមរភូមិក្តៅក្នុងអំឡុងដែលកម្ពុជាកើតមានសង្គ្រាមស៊ីវិល ប៉ុន្តែមកដល់ពេលនេះ ស្រុកស្វាយលើ បានប្រែមុខមាត់ថ្មី នឹងក្លាយជាទឹកដីមាសបៃតងមួយទៀតរបស់ខេត្តសៀមរាប ។
លោកអភិបាលស្រុកស្វាយលើបានបន្តថា ចាប់តាំងពីបញ្ចប់សង្គ្រាមស៊ីវិលនៅឆ្នាំ១៩៩៨ ក្រោមនយោបាយឈ្នះឈ្នះ និងការអនុវត្តយុទ្ធសាស្ត្រនយោបាយចតុកោណរបស់រាជ រដ្ឋាភិបាលកម្ពុជា ដែលដឹកនាំដោយសម្តេចតេជោ ហ៊ុន សែន បានធ្វើឱ្យកម្ពុជាមានការអភិវឌ្ឈរីកចម្រើនគ្រប់វិស័យ។ ក្នុងនោះស្រុកស្វាយលើ ធ្លាប់ជាតំបន់សមរភូមិសង្គ្រាមក្តៅ មានឱកាសប្រែក្លាយទៅជាតំបន់ដែលមានសក្តានុពលលើផ្នែកកសិកម្ម ពិសេសផ្នែកដំណាំដំឡូងមីនិងស្វាយ ចន្ទី ហើយសម្រាប់វិស័យទេសចរណ៍ គឺមានសក្ដានុពលសំខាន់ផងដែរ ដោយស្រុកជាប់នឹងភ្នំគូលែន ព្រមទាំងមានប្រាសាទបេងមាលាដ៏ស្រស់ស្អាត ហើយ មានរមណីយដ្ឋានទេសចរណ៍ដ៏សំបូរបែបនៅលើភ្នំគូលែន ក៏បានក្លាយ ទៅជាគោលដៅទេសចរណ៍ដ៏សំខាន់មួយ ។
លោកអភិបាលស្រុកស្វាយលើ បានអះអាងថា ដោយសារសក្តានុពលទាំងអស់នេះ បានធ្វើឲ្យវិស័យឯកជនធ្វើការវិនិយោគជាមួយធនធានធម្មជាតិនៅស្រុកស្វាយលើ ដែលជាក់ស្តែងថ្មីៗនេះ ស្រុកបានទទួលការចូលរួមវិនិយោគលើវិស័យទេសចរណ៍ពីផ្នែកឯកជនដ៏ធំចំនួន២ មួយគឺស្ពានពស់ និងមួយទៀត គឺរមណីយដ្ឋានរបស់ឯកជន ដែលការវិយោគនេះបានជំរុញកំណើនការងារ និងសេដ្ឋកិច្ចពលរដ្ឋក្នុងតំបន់នេះបានយ៉ាងប្រសើរ ។
លោកអភិបាលស្រុកស្វាយលើ ក៏បានលើកឡើងបន្តទៀតថា ការចូលរួមរបស់វិស័យឯកជន ពិតជាមានសារៈ សំខាន់ណាស់ ហើយក្នុងនាមអាជ្ញាធរស្រុក ក៏ដូចជាថ្នាក់មូលដ្ឋាន តែងតែគាំទ្រជានិច្ចចំពោះការវិនិយោគរបស់វិស័យឯកជន ហើយលោកជឿជាក់ថា ជាមួយ នឹងយុទ្ធសាស្ត្របញ្ចកោណរបស់រាជរដ្ឋា ភិបាល ដែលដឹកនាំដោយសម្តេចធិបតី ហ៊ុន ម៉ាណែត នឹងជំរុញកំណើនសេដ្ឋកិច្ចកម្ពុជាកាន់តែរីកចម្រើន និងអភិវឌ្ឍន៍គ្រប់វិស័យ ក្នុងនោះស្រុកស្វាយលើ នៃ ខេត្តសៀមរាប ក៏នឹងទទួលបាននូវសមិទ្ធិផលថ្មីៗបន្ថែមទៀត ពីការរីកចម្រើន និងសុខសន្តិភាពនេះ៕
https://kohsantepheapdaily.com.kh/article/1802401.html
