ចិន ៖ មនុស្សជាច្រើនរយនាក់បាននាំគ្នាឈរតម្រង់ជួរខាងក្រៅហាង Apple ដ៏ទំនើបមួយនៅកណ្តាលទីក្រុងប៉េកាំង កាលពីថ្ងៃសុក្រសប្តាហ៍មុន ដើម្បីរង់ចាំទិញទូរស័ព្ទ iPhone ស៊េរីចុងក្រោយបំផុត បើទោះបីជាទីផ្សារមានការព្រួយបារម្ភថា ការប្រកាន់ជំហរជាតិនិយមរបស់ប្រជាជនចិន នឹងធ្វើឱ្យការលក់របស់ក្រុមហ៊ុនបច្ចេកវិទ្យាយក្សរបស់សហអាមេរិកមួយនេះ ធ្លាក់ចុះក្នុងទីផ្សារប្រទេសចិនយ៉ាងណាក៏ដោយ។ គួររំលឹកថា ភាគហ៊ុន Apple ធ្លាក់ចុះ ក្រោយចិនហាមប្រាមមន្ត្រីខ្លួនមិនឱ្យប្រើទូរស័ព្ទ iPhone
យោងតាមប្រភពពីសារព័ត៌មាន CNBC កាលពីពេលថ្មីៗនេះ បានរាយការណ៍ថា អតិថិជនជាច្រើនក៏បានបញ្ជាទិញទូរស័ព្ទតាមការលក់អនឡាញផងដែរ ដោយគិតត្រឹមព្រឹកថ្ងៃសុក្រសប្តាហ៍មុន ការលក់ iPhone 15 លើគេហទំព័រ JD.com របស់ Dada Group ដែលជាវេទិកាលក់រាយតាមតម្រូវការក្នុងស្រុកដ៏ធំបំផុតមួយរបស់ប្រទេសចិន។
Dada អះអាងថា កម្មវិធីដឹកជញ្ជូនរបស់ខ្លួនត្រឹម១ម៉ោងបានកើនឡើង ២៥៣% បើធៀបនឹង iPhone 14 កាលពីឆ្នាំមុន។ នៅក្នុងរយៈពេល១០នាទីដំបូង បន្ទាប់ពីការចែកចាយបានចាប់ផ្តើម ក្រុមហ៊ុនបានបញ្ជាក់ថា ទូរស័ព្ទចំនួន ២៥,០០០គ្រឿងកំពុងធ្វើដំណើរដឹកជញ្ជូនទៅកាន់អតិថិជនរបស់ខ្លួន។ Dada បានបន្ថែមថា នៅឆ្នាំនេះ ខ្លួនកំពុងធ្វើការជាមួយអ្នកលក់រាយរបស់ Apple ដែលមានការអនុញ្ញាតចំនួន ៤,៦០០កន្លែងនៅក្នុងប្រទេសចិន ដែលកើនឡើងពី ៥០០កន្លែងកាលពីឆ្នាំ ២០២០។ ក្រុមហ៊ុន Apple បានចាប់ផ្តើមចែកចាយ iPhone 15 កាលពីថ្ងៃសុក្រសប្តាហ៍មុន បន្ទាប់ពីការបញ្ជាទិញជាមុនបានចាប់ផ្តើមនៅថ្ងៃទី១៥ ខែកញ្ញា កន្លងទៅ។
ដោយឡែក នៅក្នុងថ្ងៃជាមួយគ្នានោះ អតិថិជនជាង១០០នាក់ ក៏បានតម្រង់ជួរនៅខាងក្នុងហាងស្មាតហ្វូនរបស់ក្រុមហ៊ុន Apple នៅក្នុងមជ្ឈមណ្ឌលហិរញ្ញវត្ថុចិន នៃទីក្រុងសៀងហៃ ដើម្បីរង់ចាំទទួលការបញ្ជាទិញ iPhone 15 ថ្ងៃដំបូង នៃលក់ក្នុងហាង។ នេះយោងតាមប្រភពពីទីភ្នាក់ងារសារព័ត៌មានរ៉យទ័រចេញផ្សាយ។
យ៉ាងណាមិញ របៀបដែលទូរស័ព្ទ iPhone ស៊េរីចុងក្រោយបំផុតរបស់ Apple លក់នៅក្នុងប្រទេសចិន គឺស្ថិតនៅក្រោមការត្រួតពិនិត្យយ៉ាងដិតដល់ពីសំណាក់អ្នកគាំទ្រ និងអ្នកតាមដានទីផ្សារដូចគ្នា បន្ទាប់ពីការពង្រីកវិធានការទប់ស្កាត់របស់ប្រទេសចិន ដែលបានហាមប្រាមរាល់មន្ត្រីរដ្ឋាភិបាលថ្នាក់កណ្តាលខ្លួនទាំងអស់ពីការប្រើប្រាស់ទូរស័ព្ទ iPhone កាលពីដើមខែកញ្ញា ដែលគ្រានោះ បណ្តាលឱ្យភាគហ៊ុនក្រុមហ៊ុន Apple បានធ្លាក់ចុះផងដែរ។
ទោះយ៉ាងណាក៏ដោយ ភាពខ្លាំងនៃការបញ្ជាទិញជាមុនរបស់អតិថិជនក្នុងប្រទេសសេដ្ឋកិច្ចធំលំដាប់ទី២របស់ពិភពលោកមួយនេះ បានបន្ធូរបន្ថយការព្រួយបារម្ភរបស់ក្រុមហ៊ុន Apple ដោយពេលវេលាដឹកជញ្ជូនបានរុញច្រានរហូតដល់ខែវិច្ឆិកា ហើយទូរស័ព្ទ iPhone 15 Pro និង Pro Max ដែលមានតម្លៃថ្លៃបំផុតបានលក់អស់ក្នុងរយៈពេលត្រឹមតែមួយនាទីនៅលើគេហទំព័រ Tmall របស់ក្រុមហ៊ុន Alibaba ៕ (ប្រភពពី CNBC និង Reuters)
